साउन ९, मकवानपुर — मकवानपुर र चितवन जिल्लाका किसानलाई लक्षित गर्दै चालु आर्थिक वर्ष २०८२/८३ मा रु ७ करोड ६४ लाख ३९ हजार बराबरको कृषि अनुदान वितरण गरिने भएको छ।
‘राष्ट्रिय कृषि आधुनिकीकरण कार्यक्रम कार्यान्वयन एकाइ, चितवन’ले बिहीबार उक्त रकम बराबरको कृषि अनुदानका लागि प्रस्ताव आह्वान गरेको हो। एकाइका प्रमुख महेश रेग्मीका अनुसार मकवानपुरका दुई र चितवनका पाँच वटा जोनमा सञ्चालित धान, तरकारी, केरा, माछा, मौरी तथा उद्यमशीलता कार्यक्रमअन्तर्गत प्रस्ताव माग गरिएको हो।
यस योजनामा ५० देखि ८५ प्रतिशतसम्म अनुदान दिइनेछ। यस वर्ष सबैभन्दा धेरै रकम सिँचाइ पूर्वाधार निर्माण तथा मर्मतमा लगानी गरिनेछ। सो कार्यका लागि रु २ करोड ७५ लाख २५ हजार बराबरको प्रस्ताव माग गरिएको छ, जसबाट १५५ वटा सिँचाइ पूर्वाधार निर्माण वा मर्मत गरिने लक्ष्य राखिएको छ।
विभिन्न जोनहरूका लागि माग गरिएको अनुदान यथोचित रूपमा यसप्रकार छ:
- धान जोन: रु २ करोड ६४ लाख ६ हजार
- तरकारी जोन: रु १ करोड १ लाख ८० हजार
- माछा जोन: रु ९५ लाख ३८ हजार
- मौरी जोन: रु ८७ लाख १५ हजार
- उद्यमशीलता कार्यक्रम: रु १ करोड ६० लाख
- व्यावसायिक प्याज प्रवर्द्धन कार्यक्रम: रु १८ लाख (यसमा किसानले ५०% लागत व्यहोर्नुपर्नेछ)
यसबाहेक, तरकारी जोनमा प्राङ्गारिक कृषि प्रवर्द्धन, आलु खेती, गोलभेंडा ग्राफ्टिङ बेर्ना वितरण, कृषि यान्त्रिकीकरण, थोपा सिँचाइ प्रणाली, तथा बेमौसमी तरकारी उत्पादनका लागि स्थायी टनेल निर्माण कार्यक्रमहरूका लागि पनि प्रस्ताव आह्वान गरिएको छ।
कार्यालयले यी सबै योजनामा सहभागी किसानलाई ५० देखि ८५ प्रतिशतसम्म अनुदान उपलब्ध गराउने जानकारी दिएको छ।
