काठमाडौं । सोमबार देशभर मनसुन सामान्यभन्दा केही कमजोर अवस्थामा रहेको मौसमविद्हरूले बताएका छन्। जल तथा मौसम विज्ञान विभागका अनुसार, हाल मनसुनको न्यून चापीय रेखा सरदर स्थानभन्दा दक्षिणतर्फ सरिएकाले यसको प्रभाव घटेको हो। तर, बंगालको खाडीबाट आइरहेको जलवाष्पयुक्त हावाका कारण वर्षाको क्रम भने निरन्तर रहनेछ।
विभागले दिएको पूर्वानुमानअनुसार दिउँसो देशभर सामान्यतया बदली रहनेछ। विशेषगरी कोशी, बागमती, मधेश र लुम्बिनी प्रदेशका तराई तथा पहाडी भू-भागका धेरै स्थानमा मध्यम वर्षा हुने सम्भावना छ। यसबाहेक लुम्बिनीको तराई क्षेत्र र बागमतीको पहाडी क्षेत्रमा कतै–कतै भारी वर्षा समेत हुन सक्ने अनुमान गरिएको छ।
त्यस्तै, राति कोशी र मधेश प्रदेशमा सामान्यतया बदली रहनेछ भने अन्यत्र आंशिक बदली मात्र हुने सम्भावना छ। यस अवधिमा कोशी प्रदेशको तराई, बागमती र गण्डकी प्रदेशका पहाडी क्षेत्रमा केही स्थानमा भारी वर्षा हुने पूर्वानुमान गरिएको छ।
विभागले भारी वर्षा हुने सम्भावना भएका क्षेत्रमा बाढी, पहिरो र डुबानको जोखिम बढ्न सक्ने भन्दै सतर्क रहन आग्रह गरेको छ। साथै, वर्षाका कारण यातायात अवरुद्ध हुन सक्ने र दैनिक जनजीवन प्रभावित हुन सक्ने भएकाले आवश्यक सावधानी अपनाउन सुझाव दिइएको छ।
